الأم الـصـابـِـئـيــــّـــة
المحامي
عـماد عبد الرحيم الماجدي
عـيد الأم اوكًـالـَو نحتفل بيه ــ خـَذت ورده اورحِت والأمّي أهـْديهه
عـيد الأم ييمّه اليوم هذا اليوم ــ أهـَنـّي بـيج يمّـه وحـْضـَنِـت بيهـَه
كًصايبهَه تسولف عالمُضه اوراح ــ اخـدود امطـَرّكًه والحزن لافيهه
شـْبكًـتني يصبّه اوحطـّت الإيـد ــ تِـشكي للوكِـت والظـَـهَـر حانيهـَه
شـو نار ابصدرهه يشتعِـل ضيم ــ ثاريهْ الدمع يبجي اويحاجـيهَـه
بيضه وَردة الأم خو تعرفون ــ صارت سودَه هالكًِـعدت تِـناغـيهه
الورده بجـَت صاحت على الجيران ـ تِكًول احنه الورد خل نحزن اعليهه
***
لوليلي يـيمه واصبـحت هاليوم ـ (ستـّيـن اوبعـَـد) يايـُمّـه ناغـيني
(عيد الأم) ييمه كًالو ابهايوم ـ أريد آنه احتِـفِـل يايـُمه سِـمْـعـيـني
أريد ازحف ييمّه اردود يمّه اردود ـ وبإيدج الحلوه يـُمـّه كًـمطيني
وريدَن شيلِتج أتغطه بيهَه اليوم ـ وبـْحِضن الشرف يايمه دفــّيـني
أريدن من دموعج يمّه من تبجين ـ عطشان الدِموعج يمـّه اسكًيني
يايمّه حليبج مانِـشف دوم ـ خـلـّيني اعـلـَه صدرج يـُمّـه رَضعـيني
لوليلي يـَيمه اوحِظنج الكاروك ـ جنْتَ اضحـَـك ييمّه وانتِ تبجـيني
***
يايـُمّه الورد ماظنـّه بعـْد ايفـيد ـ أبيض واحْمر أوأصفر جـثـيـر الوان
آنه والورد ونت عِـزيز الروح ـ نودّع هالـوكت نِـتغـَـطـّه بالـتِـربان
آنه ادري الإنِس يبني اومَعاه الـجان ـ مايبقه أبـَد كِـلمن عليهه فـان
لكـِنّ البشر لازم يحَسْب احـْساب ـ الله ماخِـلق ( عـَبْـثاً ) أبـَد إنـسان
والصبّه بشر وتفردشت بالكون ـ صابتهم مصيبه اوعاشـَوْ الحرمان
عَ الصبّه اصبحَـت يايـُمّه كلهه اسباع ـ للغربه عِـبيد انصير كالخِرفان
خمسين الألِف لو جنـّه صبّه اصحاح ـ جمعيات عدنـَه أكثر امـْنَ الفان
منكم بالعـرض واحدكم ايجـِر طول ـ لكن البعـض منكم عـظيم الـشان
ذبلت وردتـَـك يايُـمّه هذا الـيوم ـ لــَنهه اتـموت يـُمـّه عافت الاغصان
هـذي الدنيه يـمّه اوهـاي تاليهـَه ـ أرض تيبل يـيـُمـّه دِنـيـَة الأحـزان
جايـبـْـلي (ورد) وتـًـكلي هـَاليوم ـ (عـيد الأم) الأمـّي أرد ابـاريـهـَـه
عـيد الأم اوكًالـَو نحتِـفِـل بيه ــ خـَذت وردَه اورحِت والأمّي أهـْديهه