الـشـُمـُوخ

 عِـنـد

الـمـَـــــوت

*وفي الزرازير جبناً وهي طائرة ـ وفي الـْبزاة شموخاً وهي تحتضر

المحامي

عماد عبد الرحيم الماجدي

 يشمخ كل نسـر لو يحضر الموت ـ تطير اوخايفه خويه الزرازير

صبي لو وگـع ياوسفه وايطيح ـ عليه تكثر يخَيْ ضرب السواطير

لـوحه الصبي بطنه اتصير لو جاع ـ بيهه احنه نحط واندگ بسامير

حافي الصبي وافروخه يلوعون ـ تشعوط رجله ياصبه المجامير

ماصارت يصبّه اوتالي بس عـاد ـ ماصارت تـَره ابكل الدساتـيـر

صبي ايجوع واحنه نلبس الريش ـ چثيره اهواي من هذي التصاوير

لـو يطلب (زدقِـته) منك ايريد ـ تِـلبـِـد لـيـش واتـْـدور الزواغـيـر ؟

نسيتو اجدادنه ياصبـّه والچــير ـ عاشَـوْ بالشرف خويه نجاجيـر

صِرنه من طلع خويه (يهوطاي) ـ نلعب بالذهب صِغـْـنه قواريـر

تاليهه يصبـّه الولِـد والـْمال ـ ضاعـَـت وانـْـتِـظـِـر تالي المقـاديـر

يشمَخ كل نسـر لو يحضر الموت ـ تطير اوخايفه خويه الزرازير

***

تطش بذرك يخي بالـگاع واتصيح ـ لله اوطير واتلگـْطه العصافير

ليش الصبي لو يچـهَب عِـتبتك ـ تِـسِد بابـَـك يخـَـيْ تخلق معـاذيـر

دولاب الـفـلـك ، والدهر غـدّار ـ لاتِـلـْـدغ بـعـد مثل الـزنـابـيـر

دهرك لو عكـَـس ويـّال نـوبات ـ  يـريدك تِـتـِّعـِـض ينطي تحاذير

لـَـتـْـغـِـرّك أبـَـد دنـْياك والجّـاه ـ الله ايـريـد من عِـنـْـدك فـواتـيـر

وين العاش گبلك بقـَه اومامات ـ بساتيـگ الذهب صارت طباشيـر

(لـيـر) او (ماس) ياصبّـه اوعمارات ـ ينطي ( الفايز ) ابوجهه تعابير

مالِـحگو عـليه فـَطسـان خلــّوه ـ ( اقماشي ) مالِـگــَـو بـَس الدنانيـر

هذي الدنيه ياصبّـه اوقــَدَرهَه ـ بس (هـَيي) يظل ، واحنه خِـطاطير

(تــيبـل) فانيـَه ، مابـيهـَه مخلوق ـ إحـْـنـَه لِـليجي خويـَـه نـواطـيـر

يشمخ كل نسـر لو يحضر الموت ـ تطير اوخايفه خويه الزرازير

***

سلاحـَك (ناصيروثه) وانت معروف ـ سلاح احديد من غير الشواجير

سلاحك (أسفـَـر) او(كًنزتـْنه) مكتوب ـ نريد انشوف بس وين الـنواظير

لا تـحـفـر لـخـُوك الدهـَـر دوّار ـ لـَـتـْغـَـمـّج اوتالي اتطِـيح بالـْـبـيـر

طبيخك (شاط) كافي مـَيـّـل النار ـ  نامت بالجدر حـگهه الـچـفاچـير

وجهـَـك لاتضمـّه البشر معروف ـ (لحم الضان) من لحم الخنازيـر

يشربون ابزلال الماي ياناس ـ والصبـّه اصبحـَت إلهـُم نواعيـر

ضاعت صبـّة المندايي ياناس ـ تِـلطع بيهه (جوگات الزنابير)

والشبان ضاعت خويه بالشـام ـ واحنه بـ (الـعـَرگ) نشرب عنابير

وابعمـّـان شوفو الـدرد والهـَم ـ حـطـّو ع الدرب باعـَو چـِـنابيـر

ماعِدهم (خبـز) والجوع خطـّـار ـ عدهـُم كل وكت ، واحدهم ايحير

يشمخ كل نسـر لو يحضر الموت ـ تطير اوخايفه خويه الزرازير

***

ياويلي الصبيبي ليش هالصار ـ صارت كِـلهه وابـْراسك (مخاتير)

مـاعدهم أكل والصبي هـَلكان ـ كِسروْ جنحه ، سِألـَوْ ليش مـَيـْطير ؟

ماعِـندَه طحين اويخبز الـضيم ـ يـَردونـَه ابقهـَـر يشـعِـل تِــنانيــر

( مصايب قوم عِـد قومٍ فـُـوايد ) ـ (أبو اكلاش اليچـد بوچزمه بالخير)*

كافيكم (زمـُط) بـ (الزيفي) تحچـون ـ شوفو ادموع صبـّتنه المكاسيـر

دمـوع اتـدَعـّي للهيي علـيـنـَه ـ يـنـطـّـي (الماري) للمظلـوم كل خـيـر

وكتكـُم راح ع الصبـّه تِـضحكـُون ـ دهـْـرك لو فـِسـَد ماتت عِـطاطيـر

دفـْعـُوه بالبـُرَك والماي للراس ـ لا (تبتـَـل) يصبي اوهذي مـَـتصيـر*

ياويلي على الصبـّه اوحـسـافـه ـ تِـفرهـَدنـَـه الظهر مامِش نـواطيـر

يشمخ كل نسـر لو يحضر الموت ـ تِـطير اوخايفه خويه الزرازيـر

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

*الزرازير جمع زرزور :

الخوف (الجبن) يتملكها وإن حطـّت على ناطحات السحاب

* من المثل الشعبي العراقي :

 إيـچــد أبو اكلاش ، أوياكل أبـُوچـَـزمه

* بيت الشعر العربي :  

ألقوه في اليـَمّ وقالوا له ـ إيـّاك إياـّاك أن تبتـَـل بالـْماءِ

هـَم شِـفـِــــــــت ...؟

المحامي

عماد عبد الرحيم الماجدي

مَتِـر لو مَـتـْـريـن خامـَه ـ اشْـماتِـطول الدنـْيـَه بـيـنـَـه

تالي خويه السان يسكِت ـ  يسكِـت اويخـلص حچـينه

أبـَد مايـتـّعِـظ خـويَـه  ـ اشكِـثِـر صَـلفه البـَشر عـينـَه

اتـْشوفه يـِتباهـَه ابنصُبته ـ نِـسَـه رسَّه الـبشَر طـينـَه

لا تِـظِـل مَـغـرور بـيهـَه ـ والـْطِـغـَه مـَتـْـگـلـّي ويـنـَـه؟

لو حِـضَرنـَه الموت خويَه ـ انـْهـَدل الــزيج اوبچـينـَه

من نـُموت العـَين تـُغـْمَض ـ يـِسلِـب الباقي الـْبـِديـنـَه

حـتى إسْم الـْميت نِـنـْسَـه ـ شِـلـْـنه الِـجـْنازه وجـيـنـَه

***

هـذه دنـْيـاتـَـك يـَصبـّي ـ اذكِـر اشـْسـَـوّت (احـْويـنـَه)

كلـّه خويه انـْگـلب وكتـَـك ـ زينه خويه اتصير شينـَه

دنـْيـَه خويَـه الغـَـلط بيهـَه ـ مادريـنـَه الـغـَـلِـط بـيـنـَه

لا تآخي لا تـَعاون لا تسامح ـ لا مـَحبـّه شـُوعـِمـينـَه

صبي اخوك أو ابن عـَمـّك ـ ابن خـالـَـك لو نِـسيـنـَـه؟

أرد اسألك رحمـَه لـُمـّك ـ شفِـت رمْشك عاف عـينـَه؟

شفِـت خدّك عاف دمْعه ـ من سوه اگعـَدنه اوبچينـَه؟

***

هـَم شِـفِـت تـَـنـّور ينطر ـ مامِـش ابحـْـلگـه العِـجـيـنـَه؟

هَم شفِـت ناعـور يفـتـَر ـ عـاف مـَيّه اوغـَرف طـيـنـَه؟

هـَم شِـفِـت انـْسان مـُومِـن ـ عـاف ربـّه اوتِـرك ديـنـَه؟

ليش اذن إحـْـنـَه تِـركـنـَه ـ ديـن صَـبـّـتـْـنه اويـَـقـيـنـَه؟

گِـمنه لا (نِـرشِم اونبرَخ) ـ لا أبـَد (درفــَـش) عِـلـيـَـنـَه

غـَمـّه خويه ابـكًِـصتـَه غـَمـّه ـ أغـَم والله العـاف ديـنـَه

اشبينه گولـُو؟ اشبينه احچوا ـ ضِعـْنه ياصبه انـفِـنـينـَه

***

انزايد اعـله الصبّه صِرنه ـ صارَو (استِـثـمار) لـينـَه

هـذا گـال آنه المُخـَـلـِّص ـ ذاك گـال احـْـنـَه الـْبـِدينـَـه

شُـوفـُو صبّـتـنـَه يـَصبّـه ـ من عـَـطـَشهـُم خو روينـَه

شوفـُو صبـّـتنه (الـْبزينـَب) ـ كِـتـُب عـازتهُم قـَرينـَه

صَبـي (الِـبْعـَمان) شوفـَه ـ روحـَه لِـلـْعـازَه رهـيـنـَه

بالـْيـَمَـن وابـْمَـصِـر جــَدّوْ ـ عـين كل صبّي حـَـزينـَه

حـتى (لِلصومال) وصْـلـَوْ ـ قِـسِم غِـرگـوْ بالسفـيـنـَه

قِـسِم منهـُم باع كِـلـْـشي ـ تِـسمَـع ابغـَصتـَه اوونِـيـنه

قـسِم منهم (فـوح) يشرَب ـ واحْـنـَه ناكِـل بالـْدهـينـَه

قِـسم منهُم بـَطنـَه شَـدهَـه ـ نِـسَـه جوعـَه اوهـَـلهلينـَه

***

اوهاجـَـت (الذبان) عِـدنه ـ تِسمَع ابحسـّه اوطِـنِـينـَه

والگـِصاصيب اشكِـثِـرهـَه ـ بالـْسچاچـيـن انولـيـَـنـَه

(داخِـل) الحـَگـنـَه دخيلك ـ  صلخـَوْ اجلود العَـلينـَه

گـالوْ اشْبـيكـُم اصبـْرو ـ (مـَـندي) إلـكـُم هـَـالبـِنـينـَه

( الطفل ) لو ضاع منكم ـ  مَعـذره اشـْويّه التِـهـينـَه

وصْـلت ( الفِـكـْرَه ) يصبّه ـ لِـلقـَرار احنـَه نِـسيـنـَه

أبد لاتِـسـْمَـع اوإسكِـت  ـ ماشِـفِـت شِـنـْـهي العـَـليـنه؟

واحـْـنـَه صبّه اسكـوت كلنـَه ـ و(الـفـُصَم) نايم بـدينه

منحِرف لو تحْچي گـالـَو ـ يـِســتِـر اعـلـيـنـَه نبـيـنـَه

***

أكـه هـَيي ، أكـه ماري ـ (بو الفرج) و(اليهيا) وينه ؟

هـذي دنـْياتـك يـَصبّي ـ (اقـْماشي) واگـصيـّـر عِـلينه

لا تـأمـّن بـَرض (تـيبـَـل) ـ حِـلِم مايخـْـلص رطيـنـَـه

متـَر لو مَـتـْريـن خـامَـه ـ اشْما تِـطول الدنيَـه بـيـنـَه

بــِـشـُمـَـيـهون اد هيي ربـّي

يـــــــــــــــــــاويلي

المحامي

عـمـاد عبد الرحيـم المـاجدي

يـاويلي على اليبچي بلـَه ادموع ـ ياويلي على اليـخنِـگ عـَبـُرتـَه

يـاويلي على الـْيتحـَسـّر ابليل ـ يـِفِـز امن القهـَـر يكـْتِـل حـَسرتـَه

يـاويلي على امخلگن لبس ثوب ـ من إيـدَه غصُب إخـذوْخـُبـِـزته

يـاويلي (نِـزيـز) اويشرب الماي ـ وايباوع على اليشرب دجـِلـته

(دجله) اعله الفرات ايـدوّر اوصاح ـ بغـداد الإبـن صـَد اوعـَرفته

يـاويلي على الـْيبچي بَلــَه اعيون ـ گلبـَه الـيبچي وايـنوح ابدمعـته

تگوم ادموع عينه اتبوس الـِخـدود ـ تِـعاتب بالجـِفن واتريد هِـمْـته

يـاويلي المِـشَه اوسافر بلـَه اوداع ـ يلوم ابمشيته اويغبگ ابگصتـَه

مثل (تمر ابعثگ) يوگع على الگاع ـ يـگوم ايـلوم ياويلي ابنخِـلته

يـاويلي على الينشغ ألـَم ليش ـ (صبـّي) اوماسـِمـَع أحـّـد نـَشـِغتـَه

يـاويلي على (ايتـَيـِّم) صِـرَخ ضيـم ـ مات اوماسِمـَع أحـّد صَرخته

يـاويلي او (چفـَن) ماغـَطـّه رجليه ـ حـُفـرَت گبره ياصبـّه تـُرُبته

يـاويلي على اليسكت على (الذل) ـ يقاوم للظـُلم بيـدَه او هِـدمتـَه

يـاويلي الصبيبي فـَرهِدَو بيـهْ ـ يـُضـُم ويلي غفـُل منهم (سـَكِـتـّه)

نوبات الـْبـُوَم تِنعگ على الطوف ـ تِذكرَك بالحِزن هـَمّه اوغـُربته

يـاويلي على (المـَنيوب) بالعـيد ـ لايـبچي ولا (حِــس) ابـلـَطـُمته

يـاويلي على المغشوش بالغِـش ـ هـَد اعْله الأخو اوكـَسـّر (شـَرُبته)

يـاويلي على (القوس) انضرب راح ـ مايرجع (نـَبـِل) أبداً (جِعبته)

يزرع بـالنوَه تال اصبـَح او(عيط) ـ واعثوگ النخـَل ضيـّع تمـُرتـَه

يـاويلي على (الخـَيال) لو طاح ـ تِشيلـَه الگاع واتحضنه مـُهـُرتـَه

أشـوفنهه الحِيايه صارت (انـْمور) ـ زنبور النجِـس إحذر لـَسِعـْته

يـاويلي (العِگارب) هـَدّت ابليل ـ والعگرَب تـَرَه (سـَمـّه ابلدغتـه)

يـاويلي على اليُحفر لِـخو بـيـر ـ غَـمّجهَه اووگــَع تالي ابـْحفرتـَه

يـاويلي علينـَه اضحكنه عَ الديـّن ـ والعاف الـدِيـانـَه نِكـَر (صبتـَه)

يـاويلي على اليبچي بلـَه ادموع ـ ياويلي على اليـخنِـگ عـَبـُرتـَه