ضايـع ابـْـغـُـربـَـه

المحامي

عماد عبد الرحيم الماجدي

ياضايـع اتـْـدوّر هـَـلــَـك ـ بالغربَه چاويـن اتـروح

اتفرفح اوتذكر هـَـلـَـك ـ والحَسرَه ظلــّت بالـروح

غـربه اوبعد مامش أمل ـ طير اويون دومه اينوح

واعـْـيونه تِـدمع وابـْـقهَـر ـ وايودّع ابعـينـَه الـْدوح

ياويـلي غـُربـَه ابلا أمل ـ مَجـروح واتعـد اجروح

والشـّيـب هاليضحك يَخَي ـ والإيــد مابـَعـد اتـلوح

الورد يـذبَــل مابـَـعـَد ـ عِـطـْره يـشِـمـّـك وايـْفـُوح

اترافس اوچـنـّك صرت ـ عصفور ويلي اومذبوح

والغربه ماتـُعـرف أبـَـد ـ إنت مِـتـِت لو مـَطـروح

الغربه مابـِيهـَه الـْعـَسل ـ الغربَه بـَس بيهه الـفـُوح

الغربه چـاكـوچ اويـدِگ ـ بـسمار زنجــّر بالـْروح

الغربـَه حايـط مِـن تِـلِـز ـ ظهرَك إله ايكًِـلـّـك روح

ياضايـع اتـْـدوّر هـَـلــَـك ـ بالغربَه چاويـن اتـروح ؟

***

بالغـُربـَه نفـْرح بالچـذب ـ نحسبهه خويـَـه اوبالعـدَد

حتى الـْفـَرَح لو صَح إلـك ـ إخـلال وايـعـِدّه الـعـبـِد

نركض ابغربتـنه ركـِض ـ نِـتعـَب اويـغـلـبنه الـدرد

بالغربه عاگـول اصبحِت ـ بالبيت چـنت انت الورد

الغربـَـه نِهـبـتـْـنـَه نـَهــِـب ـ بـِنـْوات ياصبـّه اوولـِـد

الغربـَـه چـنـّـك ماصرت ـ الغـربَـه مابـيـهـَـه سَـنـَـد

الغربـَـه صبّـه اشماعلت ـ ماتصبح الإيـدك عِـضـد

اتـبـوك لحـْظات الـدفـو ـ تِـنطـيـك حالـُـوب اوبَـرد

الغربـَـه تِـسلب هـيـبتـَـك ـ صار الأسـَد بـيهـَه قِـرد

الـغربـَه تِكسـِر منجـلـَـك ـ اشلون ياصبي اتـْحـَصِـد

الغربـَـه حنـظـل بالحلگ ـ اتـشـَربك اتگلـّـك شـهـَـد

الغربـَه خويـَه الدفِـنـِتـك ـ چَن گـبر وايحارب لـِحـِـد

الـغـربـَـه شـَط كِـلـّه غـدر ـ وايضيع بيه السّـابـُوح

ياضايـع اتـْـدوّر هـَـلــَـك ـ بالغربَه چاويـن اتـروح ؟

***

يالغريب الصبّي ضايع

بين غربة روحه خويه ـ اوبين عـَضـّات الـزمَـن

والغـَريب العاش غـربـه

اتـشوفه بالغربه ينازع ـ يحسب ابروحه الـمِحـَن

الغريب ايموت وايحس

الـچـفـن والله الـيـلـَبسَـه ـ والله مونـَـفـْس الـجـفـن

واحنه صبّه اليوم غـُـربَه

اطفال غربه زلِـم غـربه

النِـسَه غربه ، كلنه غربه ـ ابصيف ضـّيـعنه اللبن

والغريب اشماجنه ، اتشوفه غريب

لا جهاله اتشوف يمـّـه ـ اولاأبد عنده نسيب

الغريب ابذله ياكل ـ الغريب اودَمـّـه بالغربه رهن

الغربه ضيـّعنه الـهويـّـه

الغربه ضيّعـْـنـَه الديـانه ـ صِـرنه راس ابلا بـِـدَن

غربه واتحِش جـنهه منجل

ياغـريـب الغـُربه مُغـْـزل

وانت بيهه اتصير صوفه ـ اونوبه ياصبّي گـطِن

الغربـَه دوم الـَمرض بينـَه

والسبب خويـَه امن ادينـَه

الطـبيـب الـصبـّي ويـنـَه ؟

الـغـربـَه خويه اعـيون صَلفه ـ ريـتـْهِـن خـويـَه عِـمـَن

الغربـَه (فـختية)  قـَـهـَـر ـ اتـگـوگـي بالصيّـف اتنوح

ياضايـع اتـْـدوّر هـَـلــَـك ـ بالـغـَـربَه جاويـن اتـروح ؟

***

الـغـربـَه من تـِلعـَب فـلـَـك ـ بالجـّوز تِـلـْعـَب والـفـَـرد

الغربه تيتي / تيتي تيتي ـ مثل مارحـْـنه نِـرد

الغربه كلهه اعيوب تدري ـ اشكثر من عدهه نِسـِد؟

الغربه فار اهناك يلهث ـ صار بالغربه فـَهـَـد

افسيفس ايهمومش ابغربه ـ ينفخ ابـلغده اويهـِـد

الغربه هالضاعت ولدنه ـ واحنه بس بيهم نِـعـِد

الغربه بفلوس اليتامى ـ باگهه او صرهه اوشـِرَد

الغربه بعض الصبه كفرت ـ نِـسـَـت (هبشابه) الأحـَـد

نِـسَت (هـَيي هاد) واحد ـ واحِـد اوالله الأحـَـد

البيت ماينبني الوحده ـ البيت لازملـَه عِــمـَـد

والعمود اتشوف طولـَه ـ شنهي فـوده ابلا وتــَد ؟ّ*

الغربـَه منهـُو البيهه خـَـلــّـد ـ الـواگـف البيهه گـعـَـد

والغربَه ماعِـدهَـه رحَم ـ مامِـش ضمـيـر اولاروح

ياضايع اتدوّر هلك ـ بالغربه چاوين اتروح ؟

ـــــــــــــــــــــــــــــــــــــــــــــــــــــــــــــــــــــــــــــــــــــــــــ

*البيت لايـُبتنى إلا لهُ عـَـمدٌ ـ

 ولا عِـماد إذا لـَم تـُرسَ أوتادُ